პარლამენტარ გოჩა ენუქიძის კომპანიას, “იბერკომპანი პეტროლიუმს” რუსეთიდან მილიონ დოლარზე მეტი ღირებულების ნავთობი შემოჰქონდა 2013, 2017 და 2018 წლებში. რუსეთიდან შემოტანილ ნავთობს სახელმწიფო უწყებები ყიდულობდნენ.
2013-2021 წლებში შპს “იბერკომპანი პეტროლიუმს,” ჯამში, 3.3 მილიონი ლარის გამარტივებული შესყიდვა აქვს გაფორმებული. კომპანია საწვავს აწოდებდა ვანის, მარტვილის, ლენტეხის, ცაგერის, ტყიბულის მერიებსა და მერიის ა(ა)იპ-ებს. საწვავს ყიდულობდნენ ასევე სვანეთის მუნიციპალიტეტების საჯარო სკოლები.
2020 წლის შემოდგომაზე, საპარლამენტო არჩევნებამდე ცოტა ხნით ადრე, ენუქიძის კომპანიამ საწვავი მიჰყიდა ასევე ცაგერის, ლენტეხის, მარტვილის და ასპინძის საოლქო საარჩევნო კომისიებს.
რაჭის, ლეჩხუმისა და ქვემო სვანეთის მაჟორიტარს, გოჩა ენუქიძეს “ქართული ოცნებისთვის” და სალომე ზურაბიშვილისთვის 2016-2020 წლებში 220 ათასი ლარი აქვს შეწირული. შპს“იბერპეტროლიუმის” დირექტორმა და ენუქიძის წილის მმართველმა, ლევან დიასამიძემ “ოცნებას” 2020 წელს 40 ათასი ლარი ჩაურიცხა.
